يا ريت إنتي وأنا منتحوّل مجانين
و نهرب عا غربه ومعي سنتين خلّيكي
و نسكن بغرفة بَراديها من الياسمين
و إفرش درَجها ورد و عليه مَشّيكي
و بالشوب هوِّي إلِك بجوانح حساسين
و بالبرد خلّي جمر قلبي يدفيكي
و كلّ ما تنقوز عليكي بلبُل الشربين
إلا بشرشف الغيرة ما بغطيكي
و يمرق ملاك النعس عا رموش دبلانين
و إفرش زنودي و عا وعد الشوق غفّيكي
و تنزل عا وجهك خُصل شعرات مشقرين
و إعطش لثغرك و مالي قلب و عّيكي
و عا الأرض رب السما برحلة صبا وسنين
ما حب متلك متل غيرك يودّيكي
جَبْلِكْ بخمر وعسل مش من موي وطين
و حَبْسِكْ بصوتي صدى و ممنوع غنيكي
وقدّيش ! خلفي ركض عشاق و محبّين
و رشو دموع و رسايل عا شبابيكي
تركتُن لأني غرقِت بعيونك الحلوين
و ضيّعت كل الدني و لقيتها فيكي