أنا بْقلبي فْتَحت لَلشَّر مَلْهى

شَغله ما حَدا قَبْلي عَمَلْها

أنا الشَّر اتّبعتو عن فصاحة

وقوافي بْتِسْكِر السّامع جُمَلْها

أنا شَرِّي عِطي النّحلة صَراحة

بِبَخّة سَمّها تِحْمي عَسَلْها

أنا شَرِّي متل سِكّة فْلاحة

جَرَحْت الأرض تَ يْفرّخ سَبَلْها

أنا شَرِّي متل مِبْضَع جِراحة

بَضَعْت الرُّوح تَ إشْفي عِلَلْها

أنا شَرِّي عِطي لَلْفُرْن راحة

حْرَقْت اللّقمة الْ غَيْري أكَلها

أنا شَرِّي متل يَوم المَنَاحة

جَمَعْت النّاس تافرِّق زَعَلْها

وْلَوْما سْلاح شَرِّي بْكِل ساحة

يْحافِظ ع الضِّعاف مْن القَوايا

النَّعجه كانِت بْتَاكُل حَمَلْها