شوفو كلاب الكون عملو مظاهره

منشان شقفة كلب طالع عالقمر

هيدا شعور هيدي نوايا طاهره

هَي عاطفه بتحطّ من قدر البشر

***

كلب راح على القمر شمّ الهوا

ومات لكن موتتو عِزّ وغِوا

احتجّو الكلاب وصوت غيرتهم دوا

وجنّو قبل ما يصيب صاحبهم ضَرر

***

يا لطيف الكلب شو عندو شعور

أكتر من الإنسان عا جنسو غيور

الكلب أوفى صاحب بكلّ الأمور

وما بيشمت بخيّو إذا حلّ القدر

***

طلعة كلب عالجوّ عملت مشكلي

ومن هون فَرق العنصريّة بينجلي

هيروشيما دمّرتها القنبلي

لا تظاهر العالم ولا جنّ الخبر

***

شوفو كلاب الكون عملو المستحيل

وقامو القيامي وربّحو العالم جميل

ونحنا البشر كلّ ما وقع منّا قتيل

منودّعو بمظاهرة غضّ النّظر

***

وين العقول الفتحت بواب السّحاب

ليش للعمران ما عملت حساب

شفنا الكرامه واعيه عند الكلاب

وكرامة الإنسان ما إلها أثر

***

صحاب العقول تقدّمو بالإختراع

وما تقدّمو بحلّ المشاكل والصراع

بالشرّ وصلو عالقمر بالإرتفاع

لكن عليهم خاطر الخير انكسر

***

يلّي احتقرتو الكلب عا شخصيّتو

يا ريت في معكن سلامة نيّتو

الإنسان مهما تقدّمت عقليّتو

كان ضلّ تفكيرو متل حلم الضرير

لو ما يلاقي كلب يطلع عالقمر