يوم الأحد سافر حبيبي من الدّيار
لمّا تركني وراح منّي العقل طار
بكهف المصايب ناطر وحتّى يجي
بالعين دمعه مجمّره وبالقلب نار
***
أوّل نهار حملت قربان الفراق
وحملت عا كتافي صليب الإشتياق
ومشيت فوق الشّوق حافي للعراق
وعن قبر ليلى الباليه لملم سرار
***
وتاني نهار بكيت من ظلم الهوى
ولبّست عمري حداد بعراس النّوا
وصرت بجناح الوهم عربش عالهوا
تا شوف شو عندو الهوا عنّو خبار
***
وتالت نهار غطست في بحر الهموم
ومن سوء حظّي هون إغرق هون عوم
تا صرت في نصف النّهار شوف النّجوم
تلامس عيوني عن طريق الإنتحار
***
ورابع نهار وقفت عا شوار الدّني
وقّفة أليعازر على باب الغني
ورحت لعند يعقوب عاجز منحني
نبكي الهنا وختيار يندب إختيار
***
وخامس نهار بجرح بعدو ما اندمل
غرّقت حالي والجرح مبرك جمل
وبقيت حياتي معلّقه بخيط الأمل
آخ ما أصعب حياة الإنتظار,,,
***
وسادس نهار دورّت جنّاز السّرور
وعا نغمة الأحزان علّمت الطّيور
وزرعت روحي في ترابات القبور
يا حسرتي خمّنت بتردّ البدار
***
وسابع نهار غفيت عا فراش الإبر
ويا ريت أيوب النّبي متلي صبر
وعن حالتي ودّيت "للخنسا" خبر
وعا "صخر حزني" تعلّمت تنظم شعار
***
وتامن نهار دخلت عا سجن الكدر
ناجي خيال الولف بلسان الحجر
وعدت حفرت رسمو على درب القمر
وقلت بلكي بيلمحو خلف السّتار
***
وتاسع نهار صرخت يا شمس وقفي
شو سارقه وبين الحبال ملفلفي
جيبي حبيبي من قبل ما تختفي
يمّا بجيب الليل وبشيل النهار