أوافق اللي في البداية ما رضيت اوافقه

و بعترف ما كل من يبغي يشوف يشوفها

اللي توارت عن عيون العالم المتحاذقه

من حرصها حتى يديها ما تبين كْفوفها

الطاهره والعاقله والطيّبه والواثقه

ما تطمح ان شاعر يعدّد في مزايا وْصوفها

الغامضه لغز السنين السابقه واللاحقه

مهما تكون ظْروفها محّد يعرْف ظْروفها

واللي عيونه كل ما مَرّ البنات تْسابقه

لكن ذي لو مرّها غض النظر و يطوفها

ما تدري انها شكّلت لحظه بعمري فارقه

لو تلتفت لضيوفها انا كبير ضْيوفها

أحشد هواجيسي واستنفر قواي الخارقه

واكتب قصيدة بالذهب يطرزون حْروفها

واجي لها فارس سرى في ليل يجهر بارقه

ساري على وضْح النقا والنفس بدّد خوفها

مادام هي صوره خياليه بذهني عالقه

ياليت لي صوره وتحذفها على احد رْفوفها

أو ليت وجهات النظر بعيوننا متطابقه

وتشوفني واشوفها ويكتمل معروفها