لا والله الا بين الكبر فيني

وانا احسبن عمري له الحين عشرين

راحت بغمضت عين كل السنيني

ولا انطحن حبن براسي له الحين

بغيت ازينها وعيت تزيني

تعبت اقول بخاطري باكر تزين

اركض ورى دنياي واهملت ديني

وان مر طاري الاخرة قلت ممدين

طول الامل يلعب على الغافليني

اللي يحسبون انهم دوم حيين

الموت لو يستاذن الميتيني

اهل المعاصي ما يموتون عاصين

ان كان ما جاء الحين جاء بعد حيني

يا حظ منهو حاسب حسابها زين

اللي يبي الثنتين دنيا وديني

يفوز بالثنتين لا قدم الدين

اخير من دنيا الوهم ركعتيني

قد قالها ابن حميد قبلي من سنين

من جربوها لذة المؤمنيني

في ذمتي ما يغبطون السلاطين