يا لله وذكرك بلسم لكل مجروح

يا مرهيٍ حتى على الملحد التِّبْر

يامشبع القطعان لا راحن سروح

ومنها بفضلك دسّم انيابه البَبْر

يالله ترحم ضعفي بنزعة الروح

وتعفي ضلوعي من قسا ضمة القبْر

ولا صير يوم العرض فالنار مطروح

لا حي لا ميّت ولا ينفع الصَّبْر

مااحصي خطايا خلّت الخافق ضروح

لو الشجر أقلام والبحْر لي حِبْر

من الذنوب الروح مليانه اجروح

ولابه دوا يالله ناجع سوى عَبْر

مغفرْتك، و لا غيرها تشفي اقروح

معاصي، اكتسحت هوى النفس من كُبْر:

لهوٍ، تراوالي بداياته افروح

لكن نهاياته تجرّعتها صِبْر

اللهو خبري يجعل الصدْر مشروح

لكن طغى ضيقه ولا جا على الخُبْر

فاس الجهل ياكثر ماهدّم اصروح

بنيانها افعال الفضيله شِبِر شِبْر

يامنزل القرآن معْجز ومشروح

امنح كسور سنيني برحمتك جَبْر

عفوك بروح وعمري الباقي بروح

ادفع به ولا اذوق عن رحمتك ثَبْر

ساجد على بابك مذّله ولا اروح

ألين ترحم قلب خالي من الكِبْر

وان مالطفت بحالي بنزعة الروح

ياويل عظمي من قسا ضمة القبْر