فهاذ القسم قريت مرة ناوياك
واتفكرت أنهارها كنت انحبك
كنت صغيير وكان ڨلبي يتمناك
وكنت نخاف حتى فـ جلسة جنبك
ڨولي نحشم إذا يشوفوني بحذاك
والل نخاف اذا لحزن نسببلك
كنتي دنيا صغيرة والحلم امعاك
كنتي جنة قريبة ومبعدني عنك
كنت أُمنية حبيبة نتمناك
نلعب نا وياك نهمس في وذنك
انحبك انڨولهالك يا امحلاك
تحٌماري و تخوخي يزهى وجهك
وفي نٌص لورقة رٌسمة ناوياك
زعما وردة وڨلب مني في يدك
وحتى سهم حنين في صدري بجفاك
في غيابك ديما الخاطر يندهلك
ونار الغيرة ذا صاحبي ڨربلك جاك
يسلف ويجيب حاجة من عندك
انخاصم وانزيد ما نهدرش معاك
حت انشوف الدمع بللك رمشك
نحٌن نموت انڨولك يهزم مبكاك
ما تزيدي مانزيد نحلل وانڨلك
نسمحلك وسامحيني يا مغلاك
نبيع الروووح و نشري لبسمة من عندك
أمنتي ترضاي ولعييشة بحذاك
معرس ف الخيال للڨلب انضمك
تفكرتك ڨولتي شرطي إذا نهواك
تقرا زين واللا نبعد من جدك
كنتي نسمة و الروح محضية بدفاك
وكنتي الدهشة آه ياويلي منك
طار الوقت وطار مني حبي ذاك
لعمر تبخر وراح حضي من حبك
بقات الذكرى هاني ف قسمي ناوياك
هاتي يدك شدي وباليد انشٌدك