ياَ وَنَّتي وَنّت كِثيرِ الحُسْوفي

عُقْبَ الطّربْ وَالكَيْف فْارقَ مَشاهِيهْ

أوَنّت كَسيرَ السّاق عَظْم السُقوفي

جَاهْ الطَّبيبْ وِقَال عَمْس الْبصر فِيهْ

مَا ادْري مَتَى ياَ صخيفَ الوَسط تَوفِي

إِلىَ عَادْ دَيْني عِنْدكم مَا انْت وَافية

ياَ غَضّْ يَاللَّي غَضّ فَوق الرُّدوفي

شَنّ تَوردْ كِنّه اللّيْل كاَسيهْ

ذَوايبٍ وِلاّ التَّوالي ازْلوفِي

يِشْري لَه الرَّيْحانْ وَالطَّيبْ غَاذيه

وِمحاجرٍ فِيهاَ تِسلّ السُّيوفي

وَخَذ زَهاهْ النُّور وَالنورْ زَاهية

وتْرايبٍ بيضٍ زَهتْ فيِ السّدوفي

وَنَا اشْهد انَّ الخْمر مِن بَيْن اشافيهْ

انْ حَدَّتْ بِي يِنكسرْ عَنهُ شُوفيِ

بَالعونْ مَا اقدرْ يَاهلَ الْغيْ ارَاعيهِ

هَذي وُصوفَ التّرفْ غَمقَ الوُصوفي

غَضّ النًّهدَ مَا هُوبْ للِدينْ يُوفيهْ

سِقْيتْ ادْياره مِن حُقوقٍ ادْرُوفي

مِن كْلَّ مَرْهوشٍ يِلج الرَّعدْ فِيهْ

منْ رَايحٍ بُهْ مِثْل دَقَّ الدُّفوفيِ

يِقْهر بَهَ الشّرقي وِتمطرْ مِياهيهْ

يِسقي مِنَ الْباطنْ انْهاكَ اللُّفوفِي

الِواديَ الْمنقادْ ياَ جَعلِ يَسقيهْ

لْعيونْ مَنْ دَقَّ الهَوى بِالْكُفوفِي

رَاعي الثَّمانْ اللَّي اتْلالاَ خَزَاريةْ

اللي إلى اغْضا شَبْه بَرقٍ رَفُوفي

حَيَّر مَديدي حَيَّر اللهْ طَواريهْ

حَدرْ التّرايبْ وِالنّهدْ لُه احُزوفِي

يِشبهْ كَمَا البَريسمْ لُفتَّ مَطَاويهْ

كاسِيهْ مِنْ شُغل العَجمْ لُه اصْنوفي

وِاحْجولْ شَاخٍ سَاقها اعْولنْ فِيهْ

زَرعَ الضَّمايرْ صَفّتْته الحُيوفي

ذَالهْ اسُبوعْ اليَومْ مَا هُو بْيسقيهْ

سِهرانْ حَيْرانْ لَجا فِيهْ خُوفي

وَالصَّبر مَاني يَا ابْيضَ النَابْ قَاويهْ

وِصلاةْ رَبَّي عدَّ زَجرْ الهيوفي

أوْ ماَ سَعا خِلٍ لخلّ مِصَافيهْ

أَوْ مَا سَعَا خِلٍ لِخلّ وُلُوفِي

وَاسقاه كَاس الخَمْر مِن بَيْن أَشافيهْ

مِنْ سَلسبيلٍ لَينْ يَبريَ الحُسوفيِ

الحَوْلْ ماَ صَدهْ عَن الطُّولْ يَاليهْ