انت في وطن ديمقراطي
طاطي راسك طاطي طاطي
انت في وطن ديمقراطي
انت بتنعم بالحرية
بس بشرط تكون مطاطي
***
لما تكون شغال بذمة
خايف على مصلحة الأمة
شغلك يطلع من غير لازمة
علشان مبيعلاش غير واطي
طاطي راسك طاطي طاطي
انت في وطن ديمقراطي
***
لما حاميها يكون حراميها
وبلاده ورا ضهره راميها
طالع نازل واكل فيها
مسنود بالبدلة الظباطي
طاطي راسك طاطي طاطي
انت في وطن ديمقراطي
***
لما شقاك يصبح مش ليك
فقرك سد السكة عليك
تتلفّت تلقى حواليك
إما حرامي و إما عقاطي
طاطي راسك طاطي طاطي
انت في وطن ديمقراطي
***
لماتلاقي بلاد الدنيا
فيها البني آدم حاجة تانية
وانت في الطبقات الدنيا
قرد مسلسل أو وطواطي
طاطي راسك طاطي طاطي
انت في وطن ديمقراطي
***
لما الجهلة يبقوا أمامك
أو فوقك ماسكين ف زمامك
ويسوقك ع الهلكة إمامك
تشرب م السم السقراطي
طاطي راسك طاطي طاطي
انت في وطن ديمقراطي*
***
لما الكلمة تكون بتدينك
لما تخبي ف قلبك دينك
لما الذل أشوفه ف عينك
هات إحباطك على إحباطي
طاطي راسك طاطي طاطي
انت في وطن ديمقراطي
انت في وطن ديمقراطي