1

الشجر اللي بينزف .. خُضره ..

ترنيمه .. نسماية صيف !

الواقف متحيَّر .. تايه ..

وف روحه ..الحزن خريف

الشجر اللي استنى الميَّه ..

الموجه .. ألوان الطيف !

بيودع أحلام الغربه ..

وسراب الأوهام .. والزيف

ويفارق أشجار الزينه ..

ويعاود .... لتراب الريف !!

2

ع الدنيا كام مرّه بكيت ..

وبنيت أحلام .. وهدّيت

والعمر يعدِّي .. ويفوت

والأخضر يدبل ويموت

" وكأنك يا ابو زيد .. !!

3

تزرعنا .. تروينا الدنيا ..

تحصدنا .. ترمينا ف ثانيه

أحلامك ف الكون مرشوشه ..

والدنيا دي عروسه ف كوشه ..

وجنازه .. م الناحيه التانيه !!!

4

مع إنك .. مش سامع صوتك ..

ولا عارف عيشتك .. من موتك

مع إنك هارب من نفسك ..

الدنيا بتتحدى سكوتك

5

قلب الولد ..

كان حيِّ ميّت ..

ولاَّ ميِّت حيّ ؟