شو باك بعدك عم تقلّي شو بكي

منّك لحالك إنت وجّهت الحكي

كنت إضحك قبل ما عنّي تغيب

وبغيبتك خلّيتني حِبّ البكي

***

كنت إضحك قبل ما عنّي تغيب

وبغيبتك موّنتني نَوْح ونحيب

ومن بعد ما حمّلتني تنعشر صليب

كيف طاوعك قلبك عليّي تشتكي

***

ليش حتّى بعد هالرجعه قسيت

وكيف الخبز والملح يا ظالم نسيت

ريتك بقيت بغربتك ما كنت جيت

ولا برجعتك خلّيت راسي يتّكي

***

ريت الطّريق تكسّرت قبل الرّجوع

ولا صار قلبي فوق لهلوبة ولوع

غيابك دموع ورجعتك لَيّي دموع

ومن كتر ما عذّبتني دمعي احترق

ومنين بدها العين تجمعلك بكي