وحدي … والقلم حدّي

يغافل شرودي ويسرق الرّدّة

والصبح

تا يفيّق مرج أخضر

قصقص تياب الليل تا تقصر

والليل ما بيفل … تا يندّي

وحدي … وشتي .. وليل … وصلا … وشموع

سهران … بين القافية والحرف

إكتب .. وإمحي إسمها الموجوع

للمرّة العشرين … بعد الألف

حسّيت صرلي شي سني وأكتر

ما لقي خدّي عالمخده

وشمع العاضوّه كنت عمبسهر

اصفر لونو من السهر قدّي

سألتو … نسي ما عاد يتذكّر

ان كنّي خَدت خدّو …

يما أخد … خدّي

وُوصْلِتْ لعندي مرنّحة من الطَوف

الطَوف … المحي دعسات ما ضيها

وبعَيْنها … مرقو السهر والخوف

ودشّرو لون التعب فيها

وبلّش يقلي عقدها المرمر

بتحب؟؟؟

قِلت الحبّ من ربي

قالتْ … الما بيحب ما بيسهر

وليلَكْ سَهَر لا تجرّب تخبّي

قلت … شِعري … وشَعرِكْ الأشقر

اختصرو الدني … وتملّكو حبّي

بسهَر عا بيت الشِعر تا يشفا

وعا وعد شَعرِك تا يجي لحدّي

وبينك … وبين الشِعر ما بغفا

بَس القَهَرني … خلصت المدّه

ورح تهرب الأيام من يدّي

ولا قدِرت حبّو

قد ما بدّو

ولا قدِرت حبِّك …

قد ما بدّي