طْلَقْ لَسْرَاحْ

أَمُولا نُوبَة

بَاغِي نَرْتَاحْ

فِينَكْ يَا الْمَجْدُوبَة

صَيَّحْ يَا لْبَرَّاحْ

بْلَقْصَايْدْ الْمَكْتُوبَة

ومْحِي اللّْوَاحْ

بِدْمُوعْ التُّوبَة

تْهَبّْ لَرْيَاحْ

عْلَى النَّفْسْ الْمَغْلُوبَة

لَعْمَرْ رَاحْ

وايَّامُو مَزْرُوبَة

وشَمْسْ الصّْبَاحْ..

خْيُوطْهَا مَسْلُوبَة

زَهْرِي طَاحْ..

فَكْفُوفْ مَنْهُوبَة

الْجُرْحْ.. اجْرَاحْ..

فْدَنْيَا مَقْلُوبَة

السّْوَايْعْ لَمْلاحْ..

فْكَفَّة مَثْقُوبَة

الْمَكْتُوبْ تْلاحْ..

والظُّرُوفْ مَنْكُوبَة

الزّْمَانْ طَيَّاحْ..

كِيسَانُو مَشْرُوبَة

كْفَنْ لَرْوَاحْ..

حْنَاكُو مَنْدُوبَة

الْوَقْتْ سْلاحْ..

وكْتَافُو مَصْلُوبَة

بَرَّحْ يَا بَرَّاحْ..

رَاهْ جَاتْ النُّوبَة

كْلامْ الْمَدَّاحْ..

للنَّاسْ أُعْجُوبَة

وكْلامْ الصُّلاحْ..

غَابَة مَحْطُوبَة

لَقْلُمْ فَضَّاحْ..

ولَفْضِيحَة مَحْبُوبَة

بالسِّرْ بَاحْ..

غِيرْ هَاذِي والتُّوبَة.