محل ضلك نزل... بنزِل
محل حتَّ الصفق بنساب
دغش بدري النخيل سافر
دفق مويتو العليها الرَّك
وطارد في الفيافي رهاب
شِفِـق نور الصباح بَربَح
ضلام العتمة بالهضريب
دفق في الشارع المنحوس
بواقي الدمعة والسكليب
ولا الشارع زمان منحوس
ولا الشارع زمان ملحوس
ولا الشارع طرد فانوس
ولا الشارع زمان راقد
ينفّـض من عيونو النوم
ولا الشارع زمان راكد
بيوت حلتنا حلفن ما يبيتن ليل
مع الحلم الجفل شارد
عيان وبيان
قمر حلتنا اتسولب قدل عريان
وكان الغيم حسبني مدان
أهز كتف الخريف وأسرح
إذا ما كان أوانك آن
زبد البحر الناشب ضفرو
خلى القمرة وسكن الغابة
بكت الغنية ونشف الواقف
في الوديان مشرور
كنا تلاتة رجال وسحابة
فتنا القمرة سكنا الغابة
ما يتزلزل ما يتزلزل
إلا السبقت شوقو صبابة
كنا تلاتة رجال وسحابة
وكنت براي اللف الليل
جلبابو عليَّ
وكنت الشايل فكري الحائر
وضامّي براي أنا همِّي البيّ
فجأة تضوي العتمة شهابة
أنزل أنزل
بطن الحوت مرات بتخاوي
وجوة الجب تكسيكَ مهابة
كنا تلاتة رجال وسحابة
كنا تلاتة رجال وغلابة
كنا تلاتة رجال