ياعظيم(ن) كل ما قال كن للشي كان
فوق ظهر البر والا تحت بطن البحر
بين غلطات الجوارح وسقطات اللسان
خوفنا من قلت الزاد ومن طول السفر
أنت غافر ذنب من تاب وأنت المستعان
عفوك يوم تكور الشمس وينشق القمر
يالقويفل ودي أصدر لجمهوري بيان
وزعه في كل موقع شعر من غير أمر
وحط له في كل صفحة يابومسفر مكان
وثبته بالصوت والصورة أكثر من شهر
فيه بيت للهواجر يردد من زمان
من ورا تثليث والفيض لبقيق وقطر
قال فيه الشاعر اللي صهل مثل الحصان
لا زعزع قحطان قمنا نحذف بالغتر
والسلوم اللي بنوها وسيعين البطان
منهل(ن) لكبار وصغار وشيوح وجبر
نطلت شماغي بيمناي لطوال اليمان
طالت(ن) لوجيه ربعي وناموس وفخر
جملوني بين الأجناب صبيان قحطان
قلت خل الروس تدجر ويضربها الصطر
واقحطان إن زانوا زيان وإن شانوا شيان
وإن داعى الداعي غدو جن في هيئة بشر