قالوا تعلمت قلت عناد وفراسه
أصارع النفس والدنيا واصارعها
ودرست في مدرسة من شيّبت راسه
دنيا العنا اللي قضيفاتٍ مطامعها
تلميذها دايمٍ تكتب بقرطاسه
وتعطيه جملة دروسٍ مايضيّعها
والله عطانا نظر وقلوب حساسه
ناخذ علوم المعرفه من مراجعها
ونساير الوقت ونقيسه بمقياسه
ونوجه النفس بالواقع ونقنعها
وترى حيات الفتى مهما قوا باسه
محفوفةٍ بالخطر والموت تابعها
من مبتدا العمر حتى يلفظ انفاسه
يمر في مرحله تكثر زوابعها
أول حيات الفتى مشوار واعساسه
مسافةٍ في عجاج العمر يقطعها
وثاني حيات الفتى تدريب ودراسه
تصعب ظروف الحياه وينشغل معها
وثالث حياة الفتى يرجع على ساسه
النقطه اللي بدا منها يراجعها
يرجع لسن الهرم ويضيّع الطاسه
ويزحف مع الأرض ويخطط شوارعها
وليا تلاقت متونه وارتخى راسه
ضاعت جميع العلوم اللي مجمّعها