يا نار طفي من دموعي لهبكي
واطفي سعير بين لاضلاع مكنون
حر اللهيب اللي بصدري غلبكي
واكتم جحيم خايف الناس يدرون
بايت وعيني من ضنا الشوق تشكي
من عين عين ما رات مثلها اعيون
وتسيح جمر فوق جمرك وتبكي
باشد من بركان في صدر محزون
غدا رماد الشوق حرة حطبكي
في قلب منهوب بالالحاظ مطعون
ليته زماني صدني عن نشبكي
ولا نشبت اوياك في سلك قانون
والا عربنا تلتمس من عربكي
واقرب من القراب وياكم انكون
شف روحي اللي متلفه من سببكي
وقلبي يعرض له على حد مسنون
اطرب وغني من هواكي وطربكي
واجيد بانغام على كل ملحون
هذا التذكر والبكا من سببكي
يوم اختلط دمع ولهب هاجت اشجون