انيسة الروح تو الليل هذا بدا
قرب لها يارفيق الليل رمث وسمر
وزود عليها الحطب ياجعل زوده فدا
الليل رزقه معه من الغسق للفجر
يازينها للصديق وزينها للعدا
لاروحت تصطلي من قبل تغدي جمر
كأنها لا تشظت وانكشف ما هدا
من جوفها، وردة يحتار فيها النظر
اسمع لظاها تقل دقة طبول وحدا
ويرقص لهبها مثل رقصة بنات الغجر
كم نادت اصحاب مايوحون صوت الندا
وكم حولها طاب ليل منادمين السهر
تلقى على جالها لاضاق صدرك مدى
كأن فيها لضيقات الخواطر سحر
كم شاعر هيضت شعره، وشعر ه غدا
على لسان الاوادم بدوها والحضر
وكم عاشق جر ونات الغرام وشدا
يشكي على ضيها الفرقى وطول الهجر
تونس جميع السهارى لاستوت ماعدا ..
محروم ، روحه مخاصمها لذيذ السهر
محظوظ منهو على جالك وصل واهتدى
يا فاكهة ليل عشاق السهر والسمر
زود عليها السمر والرمث يابو ندى
تو القوافي تزين وتو طاب الشعر