يقولون المها تجفل إذا ماشافت الصيَّاد
وأنا أقول المها تقبل علي وتحتمي فيني
ألا من يقدر يفرِّق مابين الموت والميلاد
إذا تبكين من ضحكي .. وتنثر دمعتك عيني
دقايق عمري الباقي بصوره كلّبوها أبعاد
أقرِّبها من عيوني .. وأضيِّعها من ايديني
تقوليلي متى تكتب .. وشعري لاكتبت عناد
إذا بكتبكْ فعيوني .. بخونك في دواويني
أنا مثل المطر شعري وحلم الفاتنات بلاد
أبنثر فالمدى صوتي ..وابترك لك عناويني
تقوليلي لمن تكتب .. ابكتب فرحة الحساد
إذا قالوا تحبيني ..يشوفونك تجافيني
وأنا فـ احزاني الشاعر .. وحرفي لاكتبت حداد
حقيقة ماتت فـ..عيني ، وما ماتت بتلحيني
حبيبه كانت الدنيا وكانت لهفة الميعاد
وكنت الشاعر العاشق .. أزعِّلها تراضيني
وغابت ماتت بلحظة .. ومالي فـ..الممات جهاد
أبكتب بس بدموعي قصيدة كود ترثيني
( يقولون المها تجفل .. وأنا ماني لها صياد
أنا ما أصيدها لكن تجيني تحتمي فيني )!